Laat die liefde tsunamie!

Laat die liefde tsunamie!

Laat vergifnis deur my spoel

tot ek deurweek drup,

besproei my met geduld,

laat vloed in my dank en lof

oorstroom my met u liefde

sodat dit kan uitgolf

op die droë sand

van elke honger hart,

diep insypel

tot by die seerste smart

dít dan oplos, wegvoer

sodat u liefde

genesing kan bring

en verder tsunami

(San Dreyer)

My naaste

Ek wil jou tot seën wees…

net omdat jy my naaste is

wil ek jou saam met my

in ‘n ruimtetuig plaas

daar moet jy voel

dat net op Saturnus

eensaamheid is

net in dié tronk se ringe

seer woorde sweef,

vir jou moet verraad

dálk skuil in die verste ster,

verwerping

moet nie eers in ‘n ander kosmos

kán bestaan,

in hierdie ruimtetuig

wil ek vir jou tot seën wees

sodat jy hierdie lewensreis

seerloos kan leef !

(San Dreyer)

Vra vir wysheid

Sy wysheid

In die lente

van liggroen, pienk en wind

kom sy op duiwe aangevlieg,

sag swewend deur blare

en sing saam met die wind

‘n fluisterende ritsellied

oor die sagte misterie

van dít wat Hy in sy hand hou

en hoe Hy haar uitdeel

aan dié

wat Hom daarvoor vra.

(San Dreyer)

Ons ekonomie

Asgate

Wat maak jy

as daar nie in die ekonomie

vir jóú beplan is nie –

as daar nié werk is nie:

wanneer daar in gulsige onkunde

geen visie is

vir ‘n groeiende ekonomie

as daar net in groot vraatsug

met groot sorg beplan word

vir nóg korrupsie sonder gevolg?

Is dit dan

dat jy in jou swart plastieksak

by asgate dwaal,

met jou molkloue

deur vrot vullis vroetel,

in ‘n ou mynhoop jou nes uitmol?

(San Dreyer)

Dit wat predikante só min sê:

God wíl ons help met ons aardse lewe. Ons hoef Hom net te vra om vir ons slim planne te gee en ons denke asb tog net te bestuur.

Dit is ook waar vir ons geestelike en emosionele groei – gee oor. Vra sy hulp, sy bestuur hiervoor. Moenie moedeloos word nie. Nooi Hom elke dag om jou te help stry, te help groei. Jy hoef byvoorbeeld nie alleen te stry daarteen om ander nie te veroordeel nie. As jy op enige gebied wil groei, wil verander, vra die Heilge Gees om te help. En onthou om dankie te sê vir elke dag se hulp.

Oorgee

Ons drang om onsself te bestuur, laat ons vergeet van die dream team: Ons en die Koning van die heelal. Die wenspan vir wie alles moontlik is! Ons sukkel self voort terwyl die keuse daar is: vra God om te help en gee Hom die eer vir die sukses – só maklik (as jy dit kan aanvaar dat alle eer God toekom!)

Wil jy sukses beleef? Maak die keuse vir die wenspan. Nooi God om jou te help met alles en na die sukses eer jy hom!

______________

Oorgee

uit die wil om self te beheer

nooit te wil oorgee

ontkiem die vrees vir misluk,

groei werkdrang welig

tot ‘n onkruid buite beheer

blom daar ‘n leegheid

gedy ‘n eensame seer!

tog, in die oorgee aan sy Gees

kom daar ‘n simbiotiese eenheid

tussen God en mens –

met vrees bloot

‘n uitgerukte onkruid:

nutteloos, eenkant in ‘n diep sloot

Die wens vir aanvaarding

Die mens se grootste innerlike swakheid is sy begeerte om onvoorwaardelik aanvaar te word.

Hierdie begeerte maak ons weerloos. Ons sal baie doen of opgee daarvoor.

Omdat ons dit weet, behoort ons aanvaarding vryliker uit te deel. Dit vra bloot vriendelikheid, ‘n glimlag, respek en om te help waar ons kan. Dit is dus naasteliefde.

😙 Onthou dit veral met almal wat anders as jy is ennn die skoonfamilie😃!

Onvoorwaardelike aanvaarding is die grootste geskenk wat ons ‘n naaste kan gee.

——————–

Goedkeuring

Daar is ‘n knellende ketting
wat jou vasgevang wurg:

‘n ketting deur jouself
om en om jou gedraai:

ander se goedkeuring wat jou gelukkig moet hou…

Dit is ‘n ketting
waarvan die knel roep:
buig ‘n skakel oop
stap vry weg
van die een
met sy stywe nek
in sy eie ketting
wat arrogant van jou
sy goedkeuring weerhou!